Malawi-Chitimba-Kande Beach

Sodeli, au ech be öber di Malawisch Grenze cho.Als einzigi hani es Visum benötigt, da ech das vorgängig ned öbercho han esch alles chli länger gange a de Grenze.Met Gedold ond Geld esch de doch alles tiptop gange.

Gäg de Obig semmer am Lake Malawi (3. Gröschte See vo de Welt) imene schöne Beach Camp acho. Ziitzone hed sech au wedr gänderet, han wedr di glich Zyt wie Schwiiz.

Gester hämmer en Freitag gha ond ech hanen demet verbrocht eifach chli sönnele, buech läse, spieli mache, Volley spiele (A alli Mädels; ech ha aso sovell Training för Endi August wie no nie😉) Zuesätzlech hani nochli gwäsche.

I dere Woche ben ech i de Kochgruppe.Es hed Springbock ofem Grill, Hördöpfelstock, Bohne, Gmües ond Solot geh. Als Abschloss hed natürli sgmüetleche Bier ned dôffe fehle.

Höt eschs wiitergange ôber Mzuzu nach Kande Beach.Ofem Wäg hämmer mösse imene chline Dörfli ahte ond warte ond zwar of Präsidentin vo Malawi "Choize". x-Autos händ si begleitet ond mer hànd met vellne Kind am Strosserand gwartet ond gwonke. Do in Afrika döffmer vo velem ke Föteli mache, dorom chani nix zeige. In Mzuzu acho hämmer mösse go Gmües chaufe ofeme riese Märt ond nocher hämmer bi 8 ATM's versuecht Geld usezloh...emmer weder e Aktion wo vell vell Zyt brucht.

In Kandebeach acho hämmer en Villagetour chönne mache.Händ Spital ond Schuel gseh vo dene Bewohner, s Ganze esch eus de aber chli zvell worde, ganz vell Type hànd eus welle begleite...müehsam....

Am Obig hämmer no e Punch gmacht, also eifach Vodka, Rum ond Saft chli gmischt...esch mol e gueti Abwaechslig zom Bier gsi😉

Denn esch mol usschlofe agseid gsi, so guet das halt ime Zelt au goht.Ech ha de bes am 9ni gschlofe.Anderi meteme Kater bes am 12i.De Tag hani de met paarne am Strand gnosse met Läse, chli sii ond Volleyball again😉.

Zom Znacht esch bereits Spannferkel am drölle...yummiii

Nachem Esse hämmer nochli Party gmacht.4 anderi Trucks send au im gliche Camp gsi...ond me glaubts chum, aber ha emmerno ke Schwiizer atroffe😉

Sodeli, jz gohts wiiter nach Zambia, ond weder e neui Währig😉

Malawi esch sehr es schöns Land, mega grüen.De Lake Malawi füllt de gröschti Zeil vom Land us. Lüt send sehr fröndlech.Malawi esch jedoch s drittärmste Land in Afrika. Dezue chond das Sterbensalter bi ca. 40gi lied ond 75% vo de Lüt Aids händ. Vo de Kind goht nor e chline Teil i Schuel.